კრედო ბანკის მხარდაჭერით სტუდენტებისთვის კონკურსი „მარეგულირებლის დილემა“ იწყება

კრედო ბანკის მხარდაჭერით, საქართველოს ეროვნული ბანკის ფინანსური განათლების პლატფორმა „ფინედუს“ ორგანიზებით, სტუდენტებისთვის კონკურსი „მარეგულირებლის დილემა" იწყება.

კონკურსის მიზანია სტუდენტებმა უკეთ გაიცნონ ფინანსური სისტემა და საქართველოს ეროვნული ბანკის საქმიანობა, იმუშაონ აქტუალურ ფინანსურ საკითხებზე და პრაქტიკაში გამოცადონ ანალიზის, არგუმენტაციისა და გადაწყვეტილების მიღების უნარები.

კონკურსის ფარგლებში მონაწილე გუნდები მიიღებენ საქართველოს ეროვნული ბანკის საქმიანობასთან დაკავშირებულ აქტუალურ ფინანსურ დილემას. გუნდებმა უნდა გააანალიზონ საკითხი, შეიმუშაონ საკუთარი რეკომენდაციები, შეაფასონ შესაძლო გადაწყვეტილებების შედეგები და მომზადებული ნაშრომი ჟიურის წინაშე წარადგინონ.

კონკურსში მონაწილეობა შეუძლიათ საქართველოს ავტორიზებული უმაღლესი საგანმანათლებლო დაწესებულებების საბაკალავრო და სამაგისტრო პროგრამების სტუდენტებს. მონაწილეობის მისაღებად სტუდენტებმა უნდა შექმნან 3-6 წევრიანი გუნდი. გუნდის ყველა წევრი უნდა სწავლობდეს ერთსა და იმავე უმაღლეს საგანმანათლებლო დაწესებულებაში, თუმცა გუნდი შეიძლება სხვადასხვა კურსისა და მიმართულების სტუდენტებისგან დაკომპლექტდეს.

კონკურსი ორ საკონკურსო რაუნდს მოიცავს. პირველ ეტაპზე რეგისტრაციის თანმიმდევრობით შერჩეული 20 გუნდი მიიღებს მონაწილეობას, მათგან კი 5 საუკეთესო გუნდი ფინალურ ეტაპზე გადავა.

კონკურსის სამი გამარჯვებული გუნდი კრედო ბანკისგან ფულად პრიზს მიიღებს: I ადგილი - 4 000 ლარი, II ადგილი - 2 000 ლარი, III ადგილი - 1 500 ლარი. საპრიზო თანხა გუნდის წევრებს შორის თანაბრად განაწილდება.

კონკურსში მონაწილეობის მსურველ გუნდებს რეგისტრაცია 19-დან 25 ოქტომბრის ჩათვლით შეეძლებათ. პირველი საკონკურსო რაუნდი 16-17 ნოემბერს, ხოლო ფინალური რაუნდი 7 დეკემბერს გაიმართება.