კრედო ბანკი UNI4VERSE 2026-ის პარტნიორია

კრედო ბანკი საქართველოს ინოვაციებისა და ტექნოლოგიების სააგენტოს (GITA) საუნივერსიტეტო კონკურსის, UNI4VERSE 2026-ის პარტნიორია. კონკურსი, რომლის მთავარი თემა წელს ფინანსური განათლებაა, საქართველოს ეროვნული ბანკისა და მისი ფინანსური განათლების პლატფორმის, FinEdu-ს პარტნიორობით ტარდება.

UNI4VERSE 2026-ის მიზანია ახალგაზრდებში ინოვაციური აზროვნებისა და ტექნოლოგიური უნარების განვითარება, ფინანსური განათლების ხელშეწყობა და რეალურ ფინანსურ გამოწვევებზე პრაქტიკული გადაწყვეტილებების შექმნა.

კონკურსის ფარგლებში სტუდენტური გუნდები ხუთ მიმართულებაზე იმუშავებენ: ყოველდღიური ფინანსებისა და ბიუჯეტის მართვა, ფინანსური უსაფრთხოება და კიბერთაღლითობის პრევენცია, გრძელვადიანი ფინანსური დაგეგმვა, ფინანსური სერვისების ინტეგრაცია და მცირე ბიზნესის ფულადი ნაკადების პროგნოზირება.

ფინალისტები გაივლიან ტრენინგებს ხელოვნური ინტელექტისა და მანქანური სწავლების (AI/ML), პროგრამული უზრუნველყოფის შემუშავებისა და მეწარმეობის მიმართულებით. მენტორების მხარდაჭერით კი FabLab-ში საკუთარ იდეებს პროტოტიპებად აქცევენ.

გამარჯვებული გუნდი გლობალურ ტექნოლოგიურ კონფერენციაზე, Web Summit-ზე გაემგზავრება, ხოლო გამარჯვებული უნივერსიტეტი ინოვაციური მეწარმეობის ცენტრის განვითარებისთვის 20 000-ლარიან გრანტს მიიღებს. კრედო ბანკი გამარჯვებულ გუნდს დამატებით 2 500 ლარის ოდენობის ფულადი პრიზით დააჯილდოებს.

კონკურსის ფინალი 2 ნოემბერს, თბილისის ტექნოპარკში გაიმართება.

ახალგაზრდების მხარდაჭერა, ფინანსური განათლების ხელშეწყობა და ინოვაციური იდეების განვითარება კრედო ბანკის საქმიანობის მნიშვნელოვანი მიმართულებებია. ბანკი მომავალშიც გააგრძელებს მსგავსი ინიციატივების მხარდაჭერას.